واقع الحب و اسباب فشل العلاقات في المجتمع
--------------------------------------------------------------------------------
نبي نتكلم علي موضوع الشباب بصفه عامه... يعني الموضوع ما يمشيش مع الكل فيه اللي اسلوبهم في الحياه يختلف... وفيه اللي ما يقحموش نفسهم في هدا النوع من العلاقات بس في النهايه فيه تشابه نوعا ما في كل العلاقات الا التي تبدا بخطبه علي طول وتنتهي بزواج بعد فتره وجيزه من غير تطويل هادي افضل العلاقات لانها اقل مشاكل واقرب للاسلام بس ممكن احيانا فيها عيب مشاكل بعد الزواج نضرا لعدم التفاهم بس فتره وتزول... وانشاء الله ربي يوفق كل اثنين اجتمعوا بالحلال..
......
نبي نتكلم علي موضوع الشباب بصفه عامه ونحب نورد بعض اسباب فشل العلاقات..... و هنا نتكلم علي الشاب الليبي البسيط والمتوسط الامكانيات ....اللي يملك النيه الصافيه في علاقته .. وبعدين توا نتكلمو علي النوع الثاني اللي ناوي الشر من الاول....
اول شي اثنين يقروا مع بعض حبو بعض وقراب في السن او في نفس السن تقريبا و الغالب والي ملاحضه ان البنت اكبر من الولد... بس الولد يحب بصدق و البنت كدالك ... وتمشي الايام و يتورطو اكثر واكثر في علاقتهم و يديرو كل شي مع الوقت باسم الحب وتنازلات الحب والنيه الصافيه... وانهم حا يتجوزو بعض .... بعدها يتخرجوا البنت تحس روحها كبرت وتبدا تضغط علي الولد ... تعالي اخطب علي الاقل لبس خاتم..... الولد مفلس ولو حتي كان عنده بس شن بيدير.... قداش بيكون عنده حتي لو اشتغل..في نفس الوقت حتي لو كان معادش يبي مش قادر يستغني علي الحرام الي يديرو فيه مع بعض بيقعد شاد شوي لين يحصل طريق اخري وفيه الي يفوت ويولي مش قادر يبيها هيا خدا عليها ماهو مش زي بعضه حرام وحب.... لو لبس خاتم بعده تبي العرس وتبي الحوش وكان حست انه يقدر يديرلها هودم تبي اكثر ذهب وتبي تلبس وحفله الخطوبه وحلفه ا لصاله وصاحباتي ونبي المزين ونبي ونبي....وياريت هكي وبس...
المهم حتي اللي عنده المراه ما ترتاحش لن تفلسه لذالك المراه عمرك ما توريلها الضي لانها في الصرف عينها كبيره يالله.....
نرجعوا للي ما عنداش هدا اكله يعني اللي مسكين تخرج وهيا قريب من سنه وبناخد كا مثال جيل من 1975 لي 1979 لان هودم كانو من اكبر المعانين من هده .... تخرجو ونقولو خدم براتب 250 دينار وهدا محضوض اللي تخرج وخدم وخلص في معاشه طول يعني مش قعد يراجي في سنتين باش ينزل المعاش .... المهم الحياه بدت تمشي وكل ما البنت تضغك الشاب يحاول يخدم اكثر بس اللي فيه تشد معاه وينجح تجيه فرصه ويستثمرها وهدا نادر..... وفيه اللي تتسكر ويلقا الحل انه يفوتها وخلاص..... وفيه اللي يشوف لي ربي فيها ويقول بالك وحده وحده تتحسن الامور يالله ...
المهم اللي يصير غالبا الولد يكون نفسه بعد ما وصل من 30 لي 35 وفيه الي مش حايكون ويبني نفسه بكل.. بس لما يجي يبي يتجوز البنت كبرت وبنات 86 85 حتي 87 بدو يتجوزو توا باهي الولد بياخد الكبيره اللي بدا يشوفلها زي الورده الدبلانه واكبر منه والا ياخد الصغيره الي قاعده كيف منوره والنور الشباب قاعد باين علي وجهها.... طبعا هنا الخيار ومعضم الشباب للاسف يرمي الكبيره ويا خد الصغيره..... والاسباب متعدده ..... الناس معادش فيهم خير اللي هاده ماينصح بخير وخواته واقربائه واصحابه الكل يعاتبوه لا كبيره لامش عارف شني فوتها وهدا اللي موجود في مجتمعنا ما في حد متقي الله في حد .... نعرفوا غير الفتنه والحسد....يالله..والشاب يطيح في الفخ وينغر بنفسه مايندريش انها فانيا وما دايمه لي حد..... ويوهم نفسه ويبدا يدور للبنت عن اخطائها ويبدا ينبش في الماضي والحاضر والمستقبل باش يلقي سبله وفيه اللي بلا سبله تشاو بالكاوكاو يفوتها والسلام ابكي والا موتي... والبنت تقعد يا شماته ابله طازه فيا والا بالاحري كل الطازات فيها.... وتصبح تلك الفتاه موضوع الساعه في النهايه ينسو اللي داره الولد ويبقي التاريخ شاهدا علي المراءه.....وتقعد عانس او تتحول الي علاقات حميمه من هنا وهنا ومره مع هدا وبكره مع الاخر وعايشين....وفي نفس الوقت فيه اللي يتجوز حبيبته عن علاقه 5 او 6 الي 10 سنوات وهدا هوا اللي صح راجل وفكر في اخرته مش في نفسه بس وباع اللي قرن مستقبله بيه واحياه بعد ان كاد يموت.. والله اللي ما ترك حبيبته في نضري كا من احيا انسان...
مع ذالك بالنسبه لهدا الوقت جا برنامج القروض للشباب وحل مشاكل كبيره في نضر البعض وفيه اللي يشوفله زاد غرق الشباب في الحرام لو كان رابي حكم من اخذ هاده القروض ... والي خدا القرض وهو متيقن انه حرام فاثمه عليه حتي لو صدرت فتوه في المستقبل تحلل ها القروض او صارحل اخر مثلا الدوله تعهدت بسداد قيمه الزياده.. المهم الحرام حا ياخد لي حرب من الله ورسوله يعني حتي القرض لو كان حرام مش حل بل حفره اعمق لا تربح دنيا لا اخره خاسر الاثنين.....مش موضوعنا خلي نرجعو...
ولموضوع نفسه كا تعليق علي الي سبق فيه الخيانه وقابله للحدوث في اي وقت من اوقات العلاقه مثلا البنت تشوف حد اغني ويغريها بالمال والسياره والدنيا وفيه اللي يوهمها انه عنده ولما تغلط معاه مايرحمهاش لانه في نضره ما تستاهلش الرحمه لان في تفكيره فيها هيا ما جايه الا طامعه.. وفيه اللي هوا خبيث وغير هكي يضحك علي البنات باسم الحب ومن سذاجه البنت ان النوع هدا من الناس واضح ويبان من اول موقف تحتاجه او تتعرضله البنت ويتخلا عليها بس ترجعله ثاني باش يزيد يحكم عليها انها ما عندهاش كرامه ويزيد يكمل عليها.. في شباب القسوه ملت قلوبهم لانهم كانو ضحايا سابقه وفيه اللي اصلا مش ولد ناس وفيه اللي اصلا البنت هامله ومش بنت ناس يعني المفروض سواء البنت والا الولد يفكرو صح وما ينجروش تحت شعار الحب لانه طريقه عذاب واللي يبي الورد يتحمل شوكه وانشاء الله يطلع ورد مش غير شوك.... اخوتي واخواتي الليبين ما تتركوش المجال لي اي حد يحطمكم الله غالب الضروف صعبه بس والله اللي يبي ربي يغنيه ويستره يصبر ويخدم ويتوكل علي ربي كيف ما قال تعالي وبشر الصابرين... ولو انجريتو للعلاقات الغلط حا نضيعوا ويلزمنا نشوفوا غيرنا من الشعوب العربيه كيف دمروها.. ودخلو الحرام والزني في كل مكان... ونبعدو ونحاولو نوعوا من ها الفضاءيات مازلت اختي الليبيه من اشرف النساء العربيات ارجوك حافضي علي اسلام وما تغرك اللبس العاري في التلفزيون تقدري اديري كل اللي بالك فيه غير اصبري تفوزي بالدنيا والاخره ... ولاتغرك سياره حد ولا فلوس حد ولا صاحب قدام البنات بتكوشي بيه ولا غيره المهم من يضحك بعدين ... وقتنا هدا الناس اكلها تنصح بس ما حدش ماشي بالنصيحه والناس اكلها في الكلام تفهم والفعل يجيبه ربي... و انتم الشباب ما تحكموش علي المضهر وتضلموا البنات بسبب لبس او غيره والله مرات البنت اللي تشوفو فيها تلبس علي الموضه اشرف من ميه من ها المتحجبات بالجبب الي منهم مرائيات لازم نوعوا ونشوفو لي جوهر الانسان... ما نحكوش عليه بمضهره والا علي فلوسه اهم شي انه الراجل يعيش راجل ويموت راجل والبنت تعيش شريفه نبيله وتموت علي شرفها لانه اغلي ما عندها لو نسيتي يا بنت اليوم....
وسامحوني لو قسيت في بعض الامور واعلموا ان الله غفور رحيم وعفي الله عما سلف اهم شي الصدق مع النفس صح التوبه مش ساهله بس الواحد يدير جهده يصدق مع نفسه وربه والباقي زايد وربي يفتح عليه انشاء الله والدين مش باللحيه والمشي للجامع والا بالجلبيه والخمار بالعمل والنيه والمرائين والمنافقين معرفين واضحين...حتي اللي يدير في الحرام يحاسب نفسه ويدعي ربه عسي ان يجعل الله له مخرجا ويهديه. نفس الانسان ضعيفه والقلب لما يرف يتعب,والحرام عند الناس حلو املا شن خدمه الشيطان, والرفيق هوا مرات اكبر مساعد علي الحرام, ما تصيع البنت وتسهللها الحرام الا البنت اللي زيها والنصيحه الغلط تضيع, والثقه ولت بالفلوس وما تنطعن في ضهرك الا من اقرب الناس ليك لانك مش واخد حذرك منه وكاشفله سرك اعلم يا اخي وا ختي الليبيه عيش بنيتك تمشي امورك ومهما يخبثوا معاك تمشي الحياه... وحب لغيرك ما تحب لي نفسك ترتاح...والموضوع طويل وفيه العديد من الحالات المختلفه و الحالات الخاصه وكل حاله ليها تصور خاص علي اي حال انا حاولت نحكي علي القصه من الناحيه العامه ولو بندخل للتفاصيل معادش بنكمل اليوم بس الموضوع متروك للمشاركه والسلام عليكم ورحمه الله.
منقول
|
العرض العادي
