تدرين وش هي الفكرة المستحيلـه ؟
إني أفكّر بـس فـي لحظـة انسـاك
قـد قالـوا العاشـق خفوقـه دليلـه
وأنا خفوقي طاح فـي كـف يمنـاك
وإن كـان قربـك يستفـز القبيلـه
ما همني لو تزعل الخلـق لرضـاك
يا الفاتنة .. يا الناعمة .. يا الجميله
أنا وقلبـي مـع عيونـي ضحايـاك
يا الغالية .. يا العالية .. يا الكحيلـه
لا تعذلين الشعر لا قال مـا اغـلاك
يا الملهمة.. يا المبهمة.. يا الجليلـة
الله يعيـن اللـي يـعـدد مـزايـاك
فيك الحسن مـا فيـه شـئٍ مثيلـه
يصعب على العالـم يلاقـي حلايـاك
حتى منامي صار طيفـك يجـي لـه
والحلم يبكي لا قرب وقـت مسـراك
لو كان ما لي في العمر غيـر ليلـه
لاعيشها جنبـك قبـل يـوم فرقـاك
لا شفت دمعك ينتثـر فـي مسيلـه
ودّي أضمّ الدمع وأبكـي مـع بكـاك
ليـه الدقايـق فـي لقانـا قليلـه ؟!
ما امدى أشوفك يا حياتي ولا امـداك
وليه الثواني فـي غيابـك طويلـه؟!
بالله من مثلـي يصونـك ويرعـاك
ليت المواجـع فـي عطاهـا بخيلـه
وليت الليالي تضمّنـي دوم واقـراك
انسـي الليالـي القاسيـة والثقيلـه
وانسي زمانٍ مـرّ مـن دون لقيـاك
والوقت الأقشر ودي أخلـي سبيلـه
وافتح معك صفحـات قلـبٍ تمنـاك
والعاذل اللي مـا لقـى لـه وسيلـه
إلا يـدوّر كيـف تجفيـن واجفـاك
يمـوت دام إن المكـايـد هزيـلـه
ما يدري إني لو تناسيت ما اسـلاك
لو كان فـي قلبـه مشاعـر نبيلـه
ما حطني في موقـف الشـك ويّـاك
يكفـي خفوقـي مـا قبلتـي بديلـه
ويكفيه صدقك والثقـة يـوم ناجـاك
أنتـي الغـلا لاشـك محـدٍ يشيلـه
ولا تسألين القلب وشلـون يهـواك
روحي وشوفي الفكـرة المستحيلـه
وأنتي وضميرك كان تبغيني أنساك !!
الفكـرة المستحيلـه
