أنا والليل والعبره وجرح وخاطر مكسور
ونفس من هجير البعد والحرمان مقهوره
وقلب ضامي لشوفك ولا يروي ضماه بحور
وعين تحتري لحضة عياب الطيف و حضوره
ونار تنطفي مره ومره تشتعل وتثور
وقول النار مقدوره وهي ما هي بمقدوره
حسبت الليل بغيابك تمرن الليال دهور
وكني شايل بقلبي ليالي الوقت وشهوره
تصبرت وتقدرت وبنيت من الخيال قصور
ألين إن الجفى شد الركايب ونتهى دوره
تحريتك على درب القصايد من ثلاثة شهور
وحشى ما مات لك غصن يشف الماي بجذوره
تخيرت الغرام وجيت لا راضي ولا مجبور
وجيتي تسبقين خطاك مرضيه و مجبوره
وانا ما كان لي رغبه أبين وكشف المستور
ولكن الغرام أكبر من الخفاق وشعوره
جمال وود وعيون ودلال وكبرياء شعور
وفتنه تخذل عيون النهار وينطفي نوره
ولك في خافقي صوره تلاشت بين ضي ونور
وخاف أسكت من الفرحه وتنطق بسمك الصوره
عرفتك ونتهت رحلة قساوة دربي المهجور
ولا يا جملة أيام الجفى والصد مشكوره
خذتني للجفى عزه وخذني للعناد غرور
وخاف أكون بعنادي حبيب ومات بغروره
وذا كانت مسافات الخيانه للغرام قبور
وش اللي يجبر العاشق يخون ويحفر قبوره
وش اللي يجبر الشاعر يدور للشعر جمهور
مدام انتي محبينه وعشاقه وجمهوره
.gif)
