سلسلة حياة دكنجي (4)

قمر الشرقيه · 22-6-1429هـ, 07:57 مساء

بسم الله الرحمن الرحيم

اليوم راح نكون مع آخر حلقه من السيزون الأول لسلسلة حياة دكنجي .
وراح نكمل بقصة صارت معي وبين صبيه دخلت عنا على الدكان.

كان يا ما كان في قديم الزمان .............. أحكي ولا انام
لا راح أحكي
هاد يا سيدي ايل ما انتو قاعد أنا بالدكان وقت العصرية تقريبا وبقلب بالتلفزيوووون
وكالعاده الحركه داقرة وعلى الخفي خفي.
يعني الزبون بدخل بالكتير بشتريلو طاسة لبن أو قزازة بيبسي.
طبعا الحمد لله على كل شي.
ولا بدخلت صبيه على الدكان.
الصبيه : مرحبا
أنا : مرحبتين وأهلين وسهلين.
الصبيه : بدي أغلبك بلائيو عندكو جريدة أول أول مبارح ( كان اليوم الثلاثا وهي بدها جريدة السبت)
أنا : يعدمني طالبها لا والله ما في .
الصبيه : جحرتني كالعادة على كلمة يعدمني طالبها
أنا : بس استني خليني اشوفلك صندوووق المرتجعات بركدن يكونو لسا موجودين
الصبية : آه بليييز الله يخليك لأنو بدي اياها ضروري ضروري على قد ما تتصور.
أنا : ولا يهمك هلا بشوفلك
المهم أخدت مفتاح الصندووق وفتحتو واز به فاضي .
أنا : لأسف الصندوق ما فيو ولا جريده وشكلو كل يوم بيجي بوخدهم الصبح
الصبيه : يا ربييييييييييييي وهلأ شو بدي اعمل بحالي أنا . بدي الجريدة ضروري ضروي.
انا بالعادة عرق النخوة حاطو على الوضع silent بس مع هزاز.
لما شفت حالتها هيك هز عندي عرق النخوة.
أنا : خلص ولا يهمك أنا وكرمال عيونك بتكون الجريدة عندك من هوون لبكره الصبح بالكتير.
الصبيه : بس هيك راح أغلبك أنا .
أنا : لا شو غلبه ما غلبه . بدنا خدمه احنا .
الصبيه : طيب امر عليك يعني بكره الصبح.
أنا : خلص ايلي بيريحك وازا بتحبي أعطيني رقم موبايلك وأنا أول ما أتحصل عليها بحكي معك.
الصبيه : طيب انتي أعطيني رقمك لأنو مش حافظتو أنا
أنا : يعني أنا ايلي حافظو . الرقم جديد ومن كل قطر أغنيه.
الصبيه : باين ما في نصيب , خلص أنا بكره بمر عليك الصبح.
أنا : أوك بانتظارك.

المهم محسووبك لما رجع حسام سألتو انو كيف بقدر أجيب جريدة أول أول مبارح
قالي : ليش شو بدك فيها
قولتلو طلبتها زبونه ووعدتها أجيبلها اياها
قالي ازا بدك بحكيلك مع الموزع أو ازا بتدور بالسوبرماركتات الكبيرة بتلاقي فيها.
قولتلو وانات حكيتها وهيني طالع أدورلها على الجريدة
روحت البيت ولبست ولمع نظري أول شي على جبل الحسين
لفيت جبل الحسين كلو بجميع زقاقو وسوبرمارتكتاتو وانو ألاقي جريدة أول أول مبارح . عبس
توجهت بعدها للعبدلي وكل دكانه أو سوبر مارت أشوفو أدخلو وأسألو عن جريدة اول أول مبارح
طبعا ومنهم كتير بخففو دم خصوصا لما تقولو بلاقي عندك جريدة أول أول مبارح
بقولك لا والله بس عندي جريدة بكره.
ما علينا
لفيت حوالي ألف سوبرماركت ( الجمل ايلي بعد ألف وشبيهاتها زي ألفين و 10 تلاف ومليون ومليار كلها تعرب جملة عرط لا محل لها من القصة بتاتا)
أيوه لفيت حوالي ألف سوبر ماركت واني ألاقي الجريدة ما لقيتها
بآخر العبدلي لقيت محل بيبيع مجلات وجرايد وكتب دخلت وسألتو
قالي تعال هاي كمشة جرايد دور فيها وانتا حظك ازا بتلاقيها
قولتلو أنا ايلي بدور . المهم دورت ودورت لما لقيتها . وبالفعل كانت جريدة أول أول مبارح
قديش تؤمرني يا حج
الحج : ما يؤمر عليك ظالم 20 قرش
أنا : تفضل يا سيدي.
وقتها أنا حسيت الدنيا ضحكتلي ما هو آه ضحكتلي يعني انتو بتحكو عن جريدة أول أول مبارح
وبالعادة يا انأكل فوقها يا عادو تدويرها.
بعدها بوجهي على الدكان وكانت الدنيا المسا .
حطيت الجريدة بالدكان وقلت الصباح رباح
المهم تقريبا اليوم التاني بجيت البنت تاني مره على الدكان.
الصبيه : صباح الخير
أنا : صباح النور
الصبيه : ان شا الله لقيتلي الجريدة
أنا( وكلي انشكاح ) : أكيد مش أنا دقيت صدري على ايدي. ولو
الصبيه : يا بااااااااااااااي ما احسنك . لو الدنيا مش الصبح كان بستك ( الجانب الرومانسي بالقصة كلها )
أنا : بسطيه بسطيه احنا بنفتح لل 11 بالليل ازا بتحبي تيجي.
الصبيه : يئطع شرك وطلعت خفيف دم كمان
أنا : شبه هالسمايلي هاد الله وكيلكو
الصبيه : أشووف الجريدة لو سمحت
أنا : تفضلي
فردت هالجريدة على الكونتر وبلشت تقلب
فبقولها أنا انتي شو بدك فيها يعني
طلب توظيف ولا اعلان
الصبيه : لا يا زلمة أنا بدي حل الكلمات المتقاطعه تبعت جريدة يوم الجمعه .
لأنو حليتها بس وقفت عندي على رقم 8 أفقي حتى شوووف
المهم طلعت من شنتتها صفحة الكلمات المتقاطعه وفرجتني حلها وبالفعل كان ناقص عليها حرفين ب رقم 8 افقي
وكان المطلوب كلمة بديلة لكلمة أواجههم
وكان ناقص عندها حرفين زي هيك
أ _ ا ب _ ه م
فبقولها انا شو طلعت
بتقولي اسكت اسكت وأنا كل فكري بفكرها أواجههم ( يعني أكابرهم )
بس طلعت أواجههم بمعني ( أقابلهم )
وضربت ايدها على راسها . وقالتلي تفضل هاي 20 قرش ويسلموو ايديك كتير.
أنا انفصمت وقتها .
وبست ايدي وجه وقفا وقلت الله يثبت علينا العقل والدين
ودمتم .

عزاز · 22-6-1429هـ, 08:09 مساء

اقتباس:


	وقلت الله يثبت علينا العقل والدين

هههههههههههههههههههههههههههههههههههههههههههه
يسلمووووووووووو قمر الشرقية
تحياتي عزاز

الدمعة الحزينة · 22-6-1429هـ, 09:25 مساء

ههههههههههه
هههههههههههههههههههههه

يسلموووووووووووووووو
تقبلي مروري
مع تحيتي الدمعة الحزينة

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طرق مشاهدة الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

سلسلة حياة دكنجي (4)

اقلاع و هسترة