روحي ترى ماني بحاجة شعورك
توك ذكرتيني بعد ما نسيتك
توه صفالي بالمحبه شعورك
سنين اذا شان الزمان احتويتك
وانتي تجازيني بظلمك وجورك
ياما ظلمتيني وانا ما عصيتك
ولاقلتي اوطى النار امشي بشورك
ياما سهرت بغيبتك واحتريتك
وانتي تماديتي علي بغرورك
ياما حرِمت كثير لكن عطيتك
حتى بنيتي من عطاياي سورك
يا ما بكيت بدم قدام بيتك
ويزيد الى مني بكيتك سرورك
بعت الشباب وفرحته واشتريتك
وانتي ذبحتي مابقى لي بدورك
هوجست ابنسى الحزن يوم ٍ لقيتك
ورويت شوكك واهم انه زهورك
والحين لو تبكين لي ما وعيتك
عندي تساوت غيبتك مع حضورك
يا غايبه بأيامي اللي بغيتك
ما عاد تغريني حدايق قصورك
ويا عايشه بأطلال وقت ٍ هويتك
ما عاد لك نور ٍ طفى اليوم نورك
يا مضيفه نفسك وانا ما دعيتك
انتي هدمتي في يدينك جسورك
اعلنت لك من كل قلبي نسيتك
روحي ترى ماني بحاجة شعورك
|
العرض العادي
