مجبوس دجاج على طريقتي
اولا المقادير:
1_ دجاجه
2_ جيلة عيش
2- بصل كبير مقطع صغير لخلطة حشو بطن الدجاجه
1_ بصله صغيره مقطعه اربع اجزاء بالطول
1_ رأس ثوم مطحون
2_ليمون
1_فلفل اخضر حار
2_فلفل حار اخضر يطحن مع 4 فصوص ثوم
5_طماطم مقطعه صغيره لعمل الدقوس
4_بصل مقطعه صغيره لعمل الحشو
البهارات والمستلزمات : ( هيل ناعم_ بهارات مشكله _كاري _كركم _لومي اسود ناعم _فلفل اسود ناعم _ملح _ ورق غار_ مسمار اكل _ هيل غير مطحون _خل _ زيت_زبده_ زعفران)
ابره كبيره+خيط
الطريقة :
اولا: غسل الدجاجه عدل بالطحين ومن ثمه غسلها بالماء
ثانيا: اخذ ليمونه واقطعها بالنصف ومسح جميع اجزاء الدجاجه باليمون حتى من داخل البطن والأفخاذ والجناح بكل مكان
ثالثا: أخذ الثوم المطحون وفرك الدجاجه به بكل مكان فيها ومن داخل البطن جيدا جيدا
رابعا: أخذ قيل من الهيل الناعم ورشه على الدجاجه بكل مكان
هذي طريقه اطير ريحة الزفر من الدجاج نهائيا ولتعطيها نكها وطعم لذيييييييييذ
الحين نبي نسوي حشو عشان نحشي فيه بطن الدجاجه اوكي
طريقة حشو بطن الدجاجه :
نأخذ البصلتين المقطعتين بحجم صغير ونضع عليهم الفلفل الحار المطحون مع الثوم ونضع ايضا ملعقة شاي صغيره من الكاري الفلفل الأسود وملعقتين من الكركم والملح والبهارات المشكله واللومي الأسود تخلط كل هذي المقادير مع بعض جيدا وثم نضع القليل من الخل حسب الرغبه ونضع قليل من الزيت ايضا حسب الرغبه وتخلط المكونات جيدا ومن ثمه نأخذ الليمونه الأخرا ونقطعها الى نصفين نأخذ النصف الأول ونحطه داخل الدجاجه ومن ثم نحشو الدجاجه بخلطة البصل نفولها لما نحس ان الدجاجه بتنفجر ونحط النصف الثاني من الليمون داخل الدجاجه ومن ثم نأخذ الأبره والخيط ونخيط الدجاجه عدل عدل عدل.
طريقة فوح الدجاج :
وعقب ما نخيطها ونخلص نكون طبعا مسخنين ماي حار ومزهبين الجدر ناخذ الجدر ونحطه على نار عاليه ونحط الزيت داخل الجدر ويكون كمية الزيت زينه وبعدين ناخذ البصل الي قاصينه اربع اجزاء بالطول ونحمسه بالزيت ومن ثمه ناخذ ورق الغار والمسمار الأكل مع الهيل ونحمسه معاهم ومن ثمه نضع الدجاجه داخل الجدر ونقلبها مع البصل ونحط على طول فوقها ماي حار وخلو الماي يغطي الدجاجه اوكي ونحط ملعقتين طعام ملح لأن على كل جيلة عيش ملعقتين طعام ملح اوكي وخلو الدجاجه تطبخ على نار عاليه لمدة 45 دقيقه .
بهذي الأثناء نغسل الجيلتين عيش بماء دافء ونخليهم داخل الماي لما تخلص الدجاجه .
الدقوس :
وألحين ما عندنا شي شنو نسووووي اممممممممممم اي ذكرت انسوي ادقوس والحشو
الدقوس ناخذ الطماط الي قطعناه ونحط عليه ملعقة ثوم صغيره مطحونه + ملعقة ملح مالت الشكر او ملعقتين ونحط زيت فوقهم ونييب فلفل اخضر حار ونحطه فوقهم ونخليه على نار هاديه يطبخ وعقب مايذوب الطماط ونهرسه نييب قوطي معجون طماط ونحطه عليه ونزيده ماي شويه و خلطوه لما تحسون ان خلص زيدوه زيت شوي بعد اوكي خلصنا من الدقوس .
الحشو :
الحين نروح حق الحشو مال العيش
ناخذ مقلات ونحط عليها البصل الي قصيناه حق الحشو من غير لاماي ولا زيت اوكي قلبو البصل لما يصير لونه بني
بعدين حطو عليه شوي زيت مع ملح وهيل ناعم وفلفل اسود وبهارات وخمس معالق لومي ناعم مالت الشاي اوكي وقلبوه .
(والحين عقب ما خلصت الدجاجه شخلو مايها بجدر ثاني وخلوه يطبخ على نار هاديه)
طريقة كب العيش:
شخلو العيش وخلوه بالمشخال ناخذ الجدر الي طبخنا فيه الدجاجه ونحط فيه زيت وبعدين نحط العيش داخل الجدر ونحمسه مع الزيت شوي بس ثواني مو وايد وبعدين ناخذ مروق الدجاج ونحطه على العيش ويكون المروق مغطي العيش خمسه سانتي تقريبا ونخليه يطبخ ونغطيه ولما يشرب العيش الماي ويبقبق نحط تحت الجدر حديده ونقصر الجوله ونقلب العيش بالملاس ونحط على العيش شوية زبده ونغطيه ونخليه يترسا على راحته وبعدين عقب ما ينضى شوي نحط الحشو +الزعفران ونغطيه
وبعدين ناخذ الدجاجه نقليها .
وبس عاد تعرفون شلون تنجبون صح ...............؟!
بالهنا والعافيه والي يجرب يعطيني ردا اوكي
|
رد: مجبوس دجاج على طريقتي
