الزمن الكبريتي قصه تموت من الضحك

السلاااام عليكم شبااااب وبنااات شياااب وعجاااايز ..
.
اخباركم..اليوم كاتب موضوع لمنتديات محشش ..
(اشفيييه الكاتب)

المهم الموضوع من بنات افكاري وهو
.
.
((الزمـــــــن الـكـبــريـــتـــي))..
.
.
وهو زمن خيالي تجمع فيه مشاهير هذا الكون من كل الجنسيات وصارت جنسيتهم وحده ولغتهم وحده ..
كلهم من بلد تسمى (كبريت) وعاد شوفوا الزحف اللي صااااار !!!
طبعا البلد مجموعه من الشلل اللي بكلمكم عنهم بعدين .. وبتتفاجؤون من الشخصيات المشهوره وكل واحد وشلته ..
اليوم بنتكلم عن شلتنا الاولى وهي شلة المتنبي ..
في بداية الزمن الكبريتي وفي وسط مدينة (زحفان) المدينه الوحيده في بلد (كبريت) ..
كان هناك شله شديدة الزحف تسمى بشلة (الشعراء ss) ..
وكانت مكونه من ..
(المتنبي _ أبو نواس _ الفرزدق _ جرير _ عنتر بن شداد) ..

في احدى المراير كان المتنبي جالس في بيته يطالع التلفزيون .
وفجأه جات في باله فكره وقال : الحين انا مع وجهي دام اني طفشان ليش ما اتصل على الشله واقول لهم يجون بيتي ونسوي دوري بلاي ستيشن ..

واثناء التفكير ... فجأه دق جوال المتنبي ..

""ابونواس يتصل بك""

ورد المتنبي وقال هلا بابونواس توني كنت بدق عليك ..

قال ابونواس: ليش .

قال المتنبي : اشرايك نسوي تحدي بالبلاي ستيشن هنا في بيتنا والفايز ياخذ كرتون ببسي ..

قال ابونواس: والله فكره , انا كنت متصل عليك عشان اقول ماعندك مكان نروح له (زهق)..

قال المتنبي: خلاص انتظرك كلم الشله كلهم ودق على عنتر بيجر (لانه ماعنده جوال)

قال ابو نواس: على امرك ياحلو ...


المهم تجمعوا الشباب ولعبوا بلاي ستيشن كوره ورقعهم المتنبي كلهم اقل واحد خذ (5_2) و أولهم الفرزدق اللي مايعرف المربع من الأكس ما ادري ليش يلعبونه ..وعاد اخذ المتنبي الكاس ..
وقال: هاه وين كرتون الببسي ؟؟

رد الجميع بصوت واحد ((ضف وجهك ولا يكثر .. مفلسين)) !!!

قال: طيب .. انا اوريكم ,, الشرهه علي اني جمعتكم في بيتي يا المهابيل..

قال جرير: اصلن اليد خربانه وجهازك هذا بايخ دايما يعلق .. (حلو التصريفه)..

وقال الفرزدق: انا قلت لكم لو خليتوني اجيب كمبيوتر العائله حقي ونلعب ماريو احسن من هالكوره !!!

هو ما امداه يكمل كلامه الا والكل طابين عليه وطقوه طق ليييين قال بس ..


وبعدين قرروا يطلعون يتمشون عالبحر بس محتارين يروحون بسيارة مين..
قال المتنبي: انا سيارتي اللكزس توني مغسلها وابو نواس ماعنده سياره مافيه الا حبيبي جرير نروح بالكامري حقته ..

قال جرير: هاهاي هذا اللي ناقص آخر مره رحنا في سيارتي خلاص الحين دور الفرزدق ..

قال الفرزدق: سيارتي مافيها بنزين وماني فاضي اسوق..قال عنتر: خلاص نروح بسيارتي ..

قال ابو نواس: تبي تفشلنا بالددسن حقتك انت ووجهك لا وبعد تمشي كيلو وتوقف ونقعد ندف فيها اسكت بس ولايكثر..
المهم اتفقوا انهم يروحون بتاكسي (امحق راي غباااااء).....

ووصلوا البحر وراحو يتمشون واثناء ماهم يمشون شافوا (3) بنات بالجهه المقابله!!

وقال الداشر ابو نواس: ياولد شوف الكيكات اللي يمشون خصوصا الحلوه اللي بالنص ..شباب قوموا نرقمهم !!

وعاد الفرزدق كان مطوع بس زاااحف بجد .. قال الفرزدق: اتقوا الله وغضوا البصر ، بس ترى اللي يمين أحلى ياعمري عليها !!!

قال عنتر: امحق مطوع بس !! قال جرير بسرعه خلنا نلحقهم قبل يبعدون .. وراحوا وراهم والفرزدق متردد بس راح ..

وجا ابو نواس وقرب من وحده وقال لها: احم احم ممكن تاخذين الرقم؟ قالت له: اقلب وجهك! عاد ابو نواس تفشل قاموا يضحكون عليه..

وقال المتنبي: بس . خلوها علي .. وراح للبنت اللي على اليمين وقال: لقد احببتك من اعماق قلبي فهل تأخذين رقمي ؟؟ قالت له: حبك برص يا الخبل انقلع ... وانواع الضحك على المتنبي (كسر خاطري) ..

وجا عنتر وعاد كان متكشخ ولابس بدله الفنيله توصل لين الركبه والكبوس على جنب وحاط سماعات بلوتوث بأذنه وهو ماعنده جوال!! مسوي من دشر أمريكا .. وراح للبنت وتوه يبي يقول بيت شعر لها ماعطته فرصه قالت له: صديق مافي قرقر واجد روح سوي واحد فلافل !! طاح وجهه مسكين والشله ماتوا من الضحك !!

عاد جرير قال: انا انسحب مش عاوز ارقمهم شكلهم عنيدين !!

وعاد كان الفرزدق احلى واحد بالشله بس هو مطوع وما يرقم بنات ..
وجات له وحده من البنات وقالت: ياحلو ممكن نتعرف؟؟

وعاد الفرزدق التفت عالشله وابتسم لهم ابتسامه شديدة الخبث بينت سنه المكسور..

وعاد شوف الحقد والقهر اللي من الشله على الفرزدق .. وهو فرحان مع وجهه..

وقالت البنت: ممكن رقمك يا حلو..

وقال: رقمي خذيه 056 والباقي ماتغير.. وقعد يضحك بصوت عالي هاهاهاهاهاي ..

وقالت البنت: والله جد سخيف وراحت ..

والفرزدق ميت من الضحك عليها ويقول احسن هاهاهاي .

جا المتنبي معصب ويقول للفرزدق: الحين انت ووجهك اللي كأنه طاسة بدوي تجيك البنت وتطلب الرقم وماتعطيها والله انك غبي ..

قال الفرزدق ياحبيبي يا المتنبي انت وجبهتك اللي تقل ملعب كريكت استغفر الله انا اغازل واعطي رقمي بنت مستحيييل ، بس لو جات ذيك الحلوه اللي عاليمين كان اعطيها رقمي و اوصف لها بيتنا بعد .. هههههه (لا عاقل ماشاالله) ....

وتهاوشوا كالعاده وكل واحد رجع بيته بتاكسي وخلصت سالفتهم ... ... ... ...
.
.
.
.
في الحارة الاخرى كانت هناك شله ضد شلة المتنبي وهي الشله الثانيه من الشلل العشر اللي في مدينة (زحفان) ..

وهي الشله اللي تسمى بـ شلة (المهابيل) وأفرادها هم .. (نيوتن _ ارخميدس _ افلاطون _ كولوم _ اديسون)

والشله هاذي سالفتها سالفه (كلهم مايعرفون يعبرون التعبير عندهم صفر اذا قالوا جملتين بدون غلط إنجاز !!)

اكلمكم عنهم بعدين واكلمكم بعد عن مواجهتهم بشلة المتنبي وكل واحد وش يشجع بالدوري السعودي وسبب نطق المتنبي اللي يشجع نادي الشباب بالبيت الشهير

(اذا رأيت انياب الليث بارزتا ... فلا تظنن أن الليث يبتسم) ..