فلسفة شعر النساء
الحقيقه هذه الرائعه من اروع ماقرأت وهي من روائع الشاعره القديره
آهات الوله
حبيت انقلها لكم علها تعجبكم
فلسفه او شعر مدري وش تكون
المهم اني علـى قافـي سريـت
مايهم اللي بشعـري يضحكـون
اغلق سموعي وكنـي مادريـت
شاعره واعرف وش اللي يطلبون
بس اجننهـم ليـا منـي حكيـت
دام بعض الناس قصدي يفهمـون
لو ثلاثـه بـس فيهـم اكتفيـت
اكتب الابيات في صمت وسكـون
وكل بيت يجر فـي تاليـه بيـت
كان عندي بيت في قافه شجـون
كل ماجيت اكتب افكـاره نسيـت
قلت في نفسي وانا اغني لحـون
ابدعي يابنـت غيـره كمبليـت
اكتبي في حال ضحكات السنـون
او كلام الناس في حـيٍٍ وميـت
أي بيتٍ باي شكل وبـاي لـون
المهم انـك تقولـي كيـت كيـت
لاح قافي في طرف غر المـزون
وانهمر ودان شعـري وارتويـت
اغتنمت الفكر في غمضة عيـون
قلت هذا اللي على كيفـي بغيـت
علميهم كيف شعري لـو يبـون
علميهـم كيـف قافـي لابنيـت
قولي ان الشعر في راسي جنـون
خص لامن صحت للقاف ونخيـت
لاسلمت مـن اللقافـه والظنـون
اكتبه محبوك حبك اليا اشتهيـت
والحقيقه ماهتـوي كـل الفنـون
بالمزاج اكتب واسج اليا انعميـت
علمونـي عـاد ياللـي تعرفـون
هو صحيح اني على الشعر ابتليت
او عشاني بنت بـي مايقنعـون
ودهـم تنزيـل قافـي لاعليـت
مايصير الراس من غير المتـون
ولايقوم المجتمع من غيـر بيـت
الصراحـه كـل ماقلتـه يهـون
لو قريتوا ماكتبتـه ثـم محيـت
اخوكم حنون
عبدالله العجمي
|
العرض العادي
