الله من واحد ووحده جوك طايرين يبون يعرفون وش سالفة هالتاريخ
فيه نفس هالتاريخ لكن يجي قبل 21 سنه تقريبا دوت صيحات طفل بريء من قسم الولاده بمستشفى مستشفى النساء والولادة بالطائف وطبعا هذيك الايام اللي تولد هناك معروف انها من الهاي كلاس ومعروف ان ولدها ينولد وفي فمه ملاس من ذهب
طلعت الممرضه من غرفة الولاده وخشتها من ذا لذا من الوناسه وطبعا هي طالعه خصيصا لابو احمد واللي زوجته لها ساعتين تصايح تبي تنطل هاللي في بطنها وترتاح ... بعد ماوقفت الممرضه جاكلين قدام ابواحمد حطت يدها على كتفه وقالت كونقرادليشن ابوناصر جاكم ولد وش ملحه
لم يتمالك ابواحمد نفسه من الفرحه حتى انه بغى يحضن الممرضه ويدور فيها مثل الافلام الهنديه اذا فرحوا بشي وبدت تطلع منهم حركات مالها سنع
تمالك نفسه ابواحمد وحس انه بيجيب العيد ... وأخذ له نفس عميق والتفت على الممرضه وقال بيض الله وجهتس ياجاكلين على هالبشاره وجعلنا ان شاء الله نفرح بعيال عيالتس عض ابواحمد طرف شماغه ومشى بخطوه سريعه متجه لغرفة الولاده يبي يتطمن على المولود الجديد وأول مادخل وشاف زوجته ام احمد اللي الى الحين غرقتن بعرقها من بعد هالولاده وهي الضعيفه يوم شافته داخل نزلت رويسها من الحيا وواثقه انه بيجي يحب راسها ويتحمدلها بالسلامه ... لكن عاد وش تقولون ؟! الدلخ دلخ
وجع وين ودوا ولدي ؟؟ قالها ابواحمد وفوق راسه عشر علامات استفهام وعلامتين تعجب جاية على جنب !
ردت عليه ام احمد بصوت كله ضيقة صدر : الحين بدال ماتقول الحمدلله على السلامه عقب هالولاده المتعسره وتجي تبارك لي وتعبر لي عن حبك .. تجي ومطنشني ولاهمك الا الولد بس ؟هاه
ايه صح الحمدلله على السلامه بس وين راح الولد ؟ وين احمد ؟
ماشاء الله سميته احمد بعد
ايه اجل وش ابسميه بعد ؟ يكفي انه ماجاني الا بعد خمس بنات
وماخذا له عشر دقايق الا وجاكلين داخلتن عليهم ومعها الولد بعد ماغسلته ولمعته وشالت قراطيسه
ويلقطه ابواحمد من يدها ويضمه بقوووه ودموعه تقوطر على بطن الولد لدرجة ان الممرضه هاوشت ابواحمد وقالت ابعد خشتك عن بطنه لاتطيح دموعك على سره ويستشم
بعد ثلاث ايام طلعت ام احمد من المستشفى ومعها ولدها وابواحمد اللي معاد تشيله الارض من فرحته بهالولد واللي يحس انه قطعه من قلبه لدرجة انه سحب على باقي بناته وبدوا يحسون بالغيره من هالتمساح الصغير
مرت خمس سنوات وكبر احمد وصار عمره الحين ست سنوات << والله ياهو لاقيكم بعد
لاعاد لاتحسون انكم مخفات بس هذا ابواحمد يبي ولده يكبر بسرعه وعشان كذا دخل فترة الحمل اللي هي تسع شهور من ضمن عمر الولد
على الرغم من حرص ابواحمد على تربية ولده تربيه دلع وتخليه لو يمسح خشمه بالمنديل جاه التهاب من النعومه الا ان هالولد مدري منهو طالعن عليه ؟ قروووي واشهب ألهب لدرجة ان يوم كان عمره 8 سنوات فقدوه اهله الظهر ويوم دوروه لقوه يلقح النخله رجوله كنها رجل شايب ابو سبعين سنه وكلها شطوب حتى انه اذا مشى على زوليه نشب شي منها بهالشطوب وسحبها وراه
بالمدرسه كانوا يسمونه ابونشقه وكان هالاسم احب الاسماء الى قلبه والصراحه انه ماكان مهمل نفسه باللبس بالعكس كان يلبس احسن اللبس ولكن من تشوفه تحس بالخشونه وتحس ان فيه رجوله طاغيه
بدأ يقتنع ابواحمد بوضع ولده ويفتخر فيه ولما صار عمر احمد 20 سنه استلم شركات ابوه وطبعا كمل الجامعه انتساب ماشاء الله وكمل مشوار ابوه بالشركه والابو مبسوط من شغل ولده والشركه صار دخلها السنوي ثلاث اضعاف دخلها لما كان ابواحمد هو اللي يديرها
حست ام احمد ان ولدها احمد انشغل بتجارة ابوه وبدأ ينسى نفسه فعشان كذا قرروا يزوجونه وبدت الام تدور لولدها زوجة المستقبل واللي بتعينه على هالحياة في هالاثناء كان موظفين العلاقات العامه بمستشفى الملك فيصل مخترشين في ملفات المرضى ويدورون عن ملف ابواحمد او زوجته وهالشي طبعا بطلب من طبيب بريطاني قديم عندهم لكن ليش يدورون والا وش سبب حرص هالبريطاني على الحصول على عنوان ابواحمد .. هذا هو اللي مايعرفونه موظفين العلاقات العامه
وبعد مجهود حصلوا الملف وسلموه للطبيب البريطاني واللي على طول اتصل على تلفون بيت ابواحمد لكن للأسف الرقم تغير لكن رقم الشركه موجود وهو نفسه ماتغير << أصيل يارقم الشركه خخخخخخخخخخخخخخ
اتصل الطبيب البريطاني على الشركه واخذ رقم جوال ابواحمد واتصل عليه وطلب منه يقابله وكان حريص ان المقابله تكون بنفس اليوم .. وفعلا راح البريطاني لبيت ابواحمد واستقبله هالشايب المملوح وقهواه وبعد ماتقهووا وزانت امورهم ومدد البريطاني رجيلاته .. التفت على ابواحمد وقال يابواحمد يعلم الله اني ماحرصت ادورك الا عشان بنت خالتي نشبت لي وطلبت مني اني ادورك واوصل لك هالرساله .. وترا هالرساله انا مثلي مثلك ماادري وش فيها بس عاد وش تقول على هالحريم الا منهم اهتووا الشي يعلعلون بك الين تسوي لهم اللي يبون
زين جلسته ابواحمد وقال : طيب من هي بنت خالتك ؟
قال البريطاني : بنت خالتي هذي اسمها جاكلين والحين ابشرك اسلمت وغيرت اسمها الى منيره وتراها كانت تشتغل ممرضه بنفس المستشفى اللي انا فيه الحين لكن انها تقاعدت قبل عشر سنوات تقريبا ويوم راحت لبريطانيا ابشرك طاحت لها بجاره قصيميه ابوهم يدرس دكتوراه هناك وهالقصيميه جزاه الله خير علمت بنت خالتي عن الاسلام والحمدلله هداها الله واسلمت الحين عقبالي انا بعد اسلم
المهم يابو احمد اخذ هالرساله منها ومثل ماقالوا ماعلى الرسول الا البلاغ .. يالله فمان الله استأذنك انا
طلع ابواحمد يودع الطبيب البريطاني ويشكره على اهتمامه على توصيل الرساله وقبل يركب البريطاني سيارته قال لابواحمد : تصدق يابواحمد اني شرهن على هالمهبل اللي قاعدين يقرون هالموضوع هههههههههههههههههههههههههههههههههه
ابوناصر : افا وراه وش مسوين ؟
البريطاني : الحين جروووح قايل لهم في بداية الموضوع ( قبل 21سنه من الحين ) واشوفه الحين مسك بهم خط ووصل حول الثلاثين وهم متنحين ولادققوا
ابواحمد : خخخخخخخخخخخخخخخخخخخخخخخخخ الله يرجك والله انك صادق يالسبهه
البريطاني : يالله بس فمان الله تراي صيفت << الصدز بريطاني
مشى البريطاني ودخل ابواحمد البيت وهو يمشي ماقدر يصبر وفتح الرساله ومن حسن حظه ان هالرساله مكتوبه باللغه العربيه
ومع كل حرف يقراه ابواحمد كانت خطوته تثقل ودمه يجمد بعروقه وماخلص من الرساله الا وهو طايح على وجهه
والحمدلله ان ام احمد لمحته من شباك الصاله وجت تركض تشوف وش جاه
وقامت تصفق فيه وترش عليه من المويه الين صحى ابواحمد وقرا الرساله مره ثانيه وبدت دموعه تنزل والام منهبله ماتدري وش السالفه وتنتظر ابواحمد يعلمها
لما شافته تأخر ماعلمها على طول سألته وش السالفه يابواحمد ؟ وش فيها هالرساله ؟
مافيها شي .. مافيها شي ... يقولها ابواحمد وهو يقطع هالرساله قطعه قطعه ويبي ينسى كل حرف فيها وينسى ان هالولد اللي فرحوا فيه وربوه 21 سنه صار مهب ولدهم وان الممرضه البريطانيه غيرت بنتهم بولد لانها كانت متابعه ولادة ام احمد وهي اللي تولدها وعارفه ان كل اللي عندها بنات وان ابواحمد منهبل يبي ولد وعارفه بعد كم بيجيها اذا فرحتهم وقالت مبروك جالكم ولد
اترك اللي بيصير بعدها انتم اللي تقررونه
--------------------------------------------------------------------------------
زبده الموضوع :-
أمهات يطالبن بعودة عصر الولادة في المنزل بعد حوادث تبديل أطفال نجران وبيشة والطائف هل الولادة في المستشفيات تقلقك من تبديل طفلك مع آخر؟
بعد انتشار خبر حادثة تبديل طفلي نجران، التركي والسعودي، ثم خبر تبديل طفلتي بيشة والطائف، بدأ الخوف يدب ( يدب مو دب المنتفخ لا لا يعني يمشي )في قلوب عدد كبير من الأمهات السعوديات، الأمر الذي دفع بعضهن إلى تمني الولادة في المنزل، والعودة إلى عصر الدايات، خاصة أن الدايات في هذا الزمن يتميزن بالخبرة والدراية التامة، ويملكن ترخيصاً من وزارة الصحة، لأن هذا في اعتقادهن الطريق الوحيد الذي يضمن لكل سيدة الاحتفاظ بابنها الحقيقي.
هذا موضوع كااتبه صديقي باحد المنتديات
موضوع طريف وهاادف اتمنى يعجبكم
.gif)
17/2/1429
