طــيف الموادع ..؟؟

استدار وحلم عمري في يدينه ثم راح
والودايع في خفوقه شوق و آمال و طموح

وين انادي والدروب اهداب والنظره رياح
والضبابه في عيوني دمع والبارق يلوح

آه ياطيف الموادع .. و آه ياحلم الصباح
و آه ياقلب ٍ يراوح من جروح اليا جروح

آخر العهد اعتذاره و التحلل و السماح
باحه الله كيف يرجي خافق ٍ ماهو سموح !

ليتها اقدام العـطـايا ما وطت صدر الجراح
يوم حظي به يمنن والقدر عجل وسروح

ليتها اقداره تهادت لين ما أسقيه القراح
واسقى عمر ٍ جف دمه يوم جاني من ينوح

ليتني بيّحت سدي له ولا طال المزاح
يوم ضحكاتي نديه .. والفرح طبعه مزوح

كنت بحكي عن وداده ساعة العمر استراح
كنت بعطيه اعتراف ٍ كنت في بذله شحوح

كنت بعلنها (( أحبك )) واكسر اغرور الرماح
واكسر الهيبه في صدري وانثني عنده وابوح

بس حلمي في خفوقه .. واستدار الحلم .. راح
والودايع في يدينه مقفيه مع من يروح